കൊച്ചി: ഉല്‍പ്പന്നങ്ങളുടെ സ്‌പെയര്‍ പാര്‍ട്‌സു കള്‍ വിപണിയില്‍ ലഭ്യമാക്കാനുള്ള നിയമപരമായ ബാധ്യത നിര്‍മാതാക്കള്‍ക്കുണ്ടെന്ന്എറണാകുളം ജില്ല ഉപഭോക്തര്‍ തര്‍ക്ക പരിഹാര കോടതി.എറണാകുളം, കലൂര്‍ സ്വദേശിയും ഹൈക്കോടതി അഭിഭാഷകനുമായ അബ്ദുല്‍ റസാക്ക് ,സോണി ഇന്ത്യ , മഡോണ ഇലക്ട്രോണിക്‌സ് എന്നീ സ്ഥാപനങ്ങള്‍ക്കെതിരെ സമര്‍പ്പിച്ച പരാതിയിലാണ് കോടതിയുടെ ഉത്തരവ്.
2013ല്‍ 62,000 രൂപയ്ക്കാണ് പരാതിക്കാരന് ടിവി സെറ്റ് വാങ്ങിയത്. ആറു വര്‍ഷത്തിന് ശേഷം പരാതിക്കാരന്റെ ടിവി പ്രവര്‍ത്തന രഹിതമായി. റിപ്പയര്‍ ചെയ്യുന്നതിനായി സര്‍വീസ് സെന്ററെ സമീപിച്ചു.വാറണ്ടി കാലാവധി കഴിഞ്ഞതിനാല്‍ ഫ്രീ സര്‍വീസ് നല്‍കാനാവില്ലെന്നും ടിവിയുടെ സ്‌പെയര്‍പാര്‍ട്‌സുകള്‍ നിലവില്‍ വിപണിയില്‍ ലഭ്യമല്ലെന്നും സര്‍വീസ് സെന്റര്‍ പരാതിക്കാരനെ അറിയിച്ചു.33,000 രൂപ നല്‍കിയാന്‍ പ്രത്യേക ഓഫറിലൂടെ പുതിയ ടിവി നല്‍കാമെന്ന് വാഗ്ദാനവും അവര്‍ നല്‍കി.വാങ്ങിയ ടിവി റിപ്പയര്‍ ചെയ്തു നല്‍കാതെ വലിയ വില കൊടുത്ത് പുതിയ ടിവി വില്‍ക്കാനുള്ള എതിര്‍കക്ഷികളുടെ നീക്കം അധാര്‍മികമായ കച്ചവട രീതിയാണെന്ന് പരാതിക്കാരന് കോടതി മുമ്പാകെ ബോധിപ്പിച്ചു.
ടിവി പ്രവര്‍ത്തനരഹിതമായതിനാല്‍ തെരഞ്ഞെടുപ്പ് വാര്‍ത്തകളും ലോക ക്രിക്കറ്റ് മത്സരങ്ങളും പരാതിക്കാരന് കാണാന്‍ കഴിഞ്ഞില്ല.ടിവിയുടെ സ്‌പെയര്‍പാര്‍ട്‌സുകള്‍ ലഭ്യമല്ലാത്തതിന് ഉത്തരവാദി സര്‍വീസ് സെന്റര്‍ അല്ല ടിവിയുടെ നിര്‍മ്മാതാക്കളാണ് ഉത്തരവാദികളൊന്നും സര്‍വീസ് സെന്റര്‍ വാദിച്ചു
വില്‍പ്പനാനന്തര സേവനം നല്‍കാതെ പുതിയ ഉല്‍പ്പന്നം ഉപഭോക്താക്കള്‍ക്ക് വലിയ വിലയ്ക്ക് വില്‍ക്കുന്ന വ്യാപാര രീതി അധാര്‍മികവും നിയമവിരുദ്ധവുമാണെന്ന് കോടതി വിലയിരുത്തി. വാങ്ങിയ ഉല്‍പ്പന്നം റിപ്പയര്‍ ചെയ്ത് ഉപയോഗിക്കാനുള്ള ഉപഭോക്താവിന്റെ ‘റൈറ്റ് ടു റിപ്പയര്‍ ‘എന്ന അവകാശത്തിന്റെ ലംഘനമാണിതെന്ന് ഡി.ബി ബിനു അധ്യക്ഷനും , വി രാമചന്ദ്രന്‍ , ടി.എന്‍.ശ്രീവിദ്യ എന്നിവര്‍ അംഗങ്ങളുമായ ബഞ്ച് വിലയിരുത്തി.
ടിവി നിര്‍മ്മാതാക്കളായ സോണി ഇന്ത്യ 43,400 രൂപയും സര്‍വ്വീസ് സെന്ററുമായി ചേര്‍ന്ന് 30,000 രൂപ നഷ്ടപരിഹാരവും 10,000 രൂപ കോടതി ചെലവും 45 ദിവസത്തിനകം പരാതിക്കാരന് നല്‍കാന്‍ കോടതി എതിര്‍കക്ഷികള്‍ക്ക് നിര്‍ദ്ദേശം നല്‍കി.
